واي أوف لايف

17 نوفمبر 2020

حياتو في الترنسبور على كف عفريت

حياتو في الترنسبور  على كف عفريت

الساك فوق ظهرو ، البورطابل مكفن في أغرب البلايص، عينيه منفوخة بالنوم و هو يجري و يلهث 

أكيد مش يلعب في السبور و إلا يحوس ! هاذي يا سيدي هيئة التونسي الصباح وهو يحصر في الترنسبور ! 

النقل في تونس حكاية و رواية و شخصياتها قد شعر الراس ! هو بالأحرى عالم موازي تنجم تعيش و تشوف فيه العجب : براكاج السبعة متاع الصباح،نطرة و سبة عالطاير ،تحرش بكل أنواعو ! الحاصل كان تحب تعيش شوية رعب و أكسيون عليك بالميترو والتران.

التمرميدة بالطبيعة تختلف من وسيلة إلى أخرى :

كانك مستانس بالرونديفو آراب ،تعشق الروتار و وليدها أمور سبور ! انا نقلك عليك بالكار الصفرة و عينيك مغمضة ! انتي تجري و هي تجري 

ماننساوش بالطبيعة محبوب الجماهير و ملك الأتوروت "التاكسي جماعي" أو الأصح "البويغ التونسي الصنع" حاجة ماتفهمهاش خليقة و إلا صنيعة ، صاروخ على حالو ، عايش بشعار "طير و لا تبالى " عادي تخرج مالدار ال9 توصل ال8 . 

دونك كان عرفك صعيب عليك بالتاكسي جماعي ، إجبد نفس و ومية تجي في بيروك !

ساعات تضيق بيك و تغلط غلطة عمرك و تقول يلا توة ناخو التران! هنا عندك حلين يا تاكل طريحة يا تروح عريان ! تبدا قاعد في أمان الله تخمم في عشاء الليلة وإلا في صاحبتك إلى بعثتك و تهبط عليك حجرة مالسماء ! و ساعة ساعة يعرضك طرزان ينقز فوق الترينو وإلا سيّد يترنح عاليمين و اليسار يغني و يلحن و ماعلى بالو بالطقس ! 

كان ظهرلك نهار و حبيت إدلل روحك و تاخذ تاكسي ما نقلك كان ربي معاك و عليك بالصبر و طول البال ... 

بعد ما تأيس وانتي مطيش تستنتى يجيك شوماخر بالفراري تشعل بالأحمر ! تفرح و تقول سلكتها توة نركب مرتاح و نوصل عامل جو لا عصب كار ولا ميترو ! 

نحب نقلك يبطى شوية ، ماو لازم التاكسيستي يمارس ما تيسّر من العادات و التقاليد و يقلك بعض الجمل الشهيرة كيما : 

"سامحني صاحبي ماكش في ثنيتي" ، "كان ماعندكش صرف من غير ماتركب" ، "اووومبوتيياج خويا منجيبش منها الثنية هاذي " إلخ ...

انتي وقتها عليك كان تبرد دمك ،و تستنى الي بعدو .. . يوقفلك و تركب فرحا مسرورا . وملي تركب تبدى الهدرة : الطقس ،السياسة،الفن و حتي قيسون شتعشى البارح يحكيلك عليه . الجزيرة شخصيا توصلك للدار .

إلي حكيناه الكل مايمنعش إلي ساعات فما حاجات محلاهم يعرضوك في رحلتك اليومية .ناس بسطاء يحللولك قلوبهم وتضحك معاهم مالقلب ، ناس تحس بتعبك و تعطيك بلاصتها ،مرا كبيرة تدعيلك دعوة خير بعد ما تعاونها...

مانجموش زادا ننساو إلي ياما بدأت قصص حب بغزرة في الميترو و إلا تبسيمة فالكار ...

 

غفران شرفان

 

 

 
 
Drop here!

صراع الشيخة و الحرام في مخ التونسي

الڨلاص و البيرة ٫ شيخة,بلعة٫كعبات ...كلمات و مصطلحات ...

الحب الافلاطوني بين التونسي و كرهبتو

  يحبو الميكانيك صاحبي ! جملة تخليك تفهم الي ...

اليوم العالمي للرجال

  19 نوفمبر يبانلكم تاريخ عادي وبرشة كيف يسمعوا بيه ...

موضة الرجال فيها اللبسة فقط ؟

هو" زادة كيفو كيفها "هي" يهتم بمظهرو وبلبستو ...

حياتو في الترنسبور على كف عفريت

الساك فوق ظهرو ، البورطابل مكفن في أغرب البلايص،عينيه ...