نعرس والا ما نعرسش؟ اذا نعرس باش نعيش مرهون عشرين سنة لقدام وحتى الحنة والرمو ما يفضوهاش...وإذا ما نعرسش بنت الناس باش تخليني وباش يكثر علينا الكلام
.مخطوبين عنا سنين والزوز نخدموا ولا خلطت نبني دار ولا خلطت نشري أرض. الحل فالبانكة! نترهن عشرين سنة ولا نبقا بلا مرا تفهمني وتحبني عمري لكل؟
العادة والعوايد
موش صحيح الي التونسي ما يحبش يعرس، ويكذب عليك الي يقلك الوحدة أرتح. أغلب الناس تتمنى تلقى شريك يقسم معاه الحلو والمرّ لكن هالحلمة قداه باش تكلّف؟
الي يعتبر حق مكفول في بلدان أخرى، في تونس ولّا يقرب للحلم الي تسعالو برشة باش تحققوا.
من ناحية العيلة تشرط ومن ناحية الدار تتكلف، ومن ناحية الحياة صعبت..منين باش يلقاها الواحد؟
الاكيد انو حل عالمعادلة ماهوش في عرس مكلف وماهوش في عرس يقسم الظهر وماهوش في عرس يرضي العباد ويملا عينيهم باش يقولو يااااا فلان شوف شعمل وفلان معملش. لأنو فالحالات الكل ارضاء الناس غاية لا تُدرك!
العرس على شكون؟
برشة قبل العرس يدخلو في دوامة السؤال المعروف الراجل شيلزمو يجيب والمرا آش تجيب... منظومة العرس في تونس كيفها كيف أي مشروع آخر إذا ناوي تدخل فيه يلزمك تشارك موش كان بالفلوس لكن بالرغبة فالتشارك والجهد والصدق والمسؤولية وباش يتحقق هذا الكل يلزم تقسموا العرس على جهدين وفي كل التفاصيل ومذبينا نلغيو عقلية هذي عليك وهذي عليا لانها باش توفى بطريقتين وحدة أمرّ من وحدة والي هوما يا قرض فالبانكة يخنقك عمرك كامل ويخليك تعيش بالتقسيط وبالقطرة، والا باش يخلق حساسيات بين الكوبل وبين العايلات.
بسّطها تبساط
البساطة ماهياش مجرد كلمة تعرضنا في كتاب والا في غناية..فالحقيقة البساطة هي طريقة حياة اعتمدوها برشة مؤخرا وجابت نتيجة...في عوض العرس الي يدوم 7 ايام و7 ليالي تنجم تعمل فرحة العمر في عشوية وسهرية، تستدعى فيها ما قل وما دل من اقرب الناس والاحباب والأصحاب الي يفرحولك، وفي عوض عشاء ووطية وحنة وطيحة وتكربيسة ومصروف ازرق تكمندي بيتزا للكل..شوي مشروبات غازية وكحولية... تكري طرح بلاي للمغرومين وشاشة كبيرة للي يحب يتفرج وينقنق شوي ماكلة...ضحكة وشطحة وتتعدا فرحة العمر بفرحة الأصحاب.
مربط الفرس
الدنيا هذي ساعة! يا تعيشها بما تقدر وتحاول تطور كل يوم خطيوة خطيوة، يا باش تتبلوكا عمر كامل لين تلقى الساعة وفات ولا حققت مرادك ولا عشت وقت باهي..والعرس ينطبق على المسار هذا. المحبة كيف الجمر يجيها وقت وتحاول تطفا واكثر حاجة تنجم تطفي المحبة هي الجري ورا حاجات تعرقل المشاعر..العرس ماهو الا خطوة عادية ودرجة تطلعها كيف ما تطلع درجات من دروج الدنيا! سهلوها على بعضكم، أرضاو بالموجود واخدموا للمنشود، عرسوا بالموجود وطوروه..واياكم وعطيان الوذنين للعباد لأنو ما يملى عينيهم كان التراب.. والي يحاسبكم جاوبوه بجملة وحدة " الي شاهي شهوة يديرها في عشاه".
عيشوا الحب بلي توفر وشاركوا اوقاتكم الحلوة واصنعوا لحظة الفرحة وما تحسبوهاش برشة!الحكاية مرهونة في خاتم وتصحاحة وباااااااارشة حب وإرادة!
سيرين الكافي